दोहा – गैरआवासीय नेपाली संघ (एनआरएन) ले नेपालमा घुम्ती रगत संकलन बस सेवा संचालन गर्ने भएको छ ।

परियोजनाबारे गैरआवासीय नेपाली संघले नेपाल रेडक्रस सोसईटी चितवनसँग सहकार्य गरि मौसम प्रतिकूलताको बेलामा पनि रगत संकलन गर्नको लागि “घुम्ती रगत संकलन बस परियोजना” संचालन गर्न लागेको जनाएको छ ।

यसले रगतको संकलन तथा भण्डारणमा सहज बनाई रगतको व्यवस्थापनलाई गुणस्तरीय र सर्वसुलभ बनाउन मद्धत गर्ने अपेक्षा गरिएको छ । यस परियोजनाको लागि स्वास्थ्य सामाग्री सहितको बसका लागि सम्झौता भइसकेको एनआरएनले जनाएको छ ।

रगत संकलनका लागि यही अक्टोबरमा क्षेत्रीय रक्त संचार सेवा भरतपुरलाई हस्तानतरण हुनेछ ।

गैरआवासीय नेपाली संघका अध्यक्ष कुमार पन्तको नेतृत्व तथा सचिव गौरी राज जोशीको संयोजकत्वमा रहेको यस परियोजनामा सबै गैरआवासीय नेपालीहरुलाई सहयोग गर्न समेत अनुरोध गरिएको छ ।

नेपाल रेडक्रस सोसाईटी चितवन जिल्ला शाखा अन्तर्गत क्षेत्रिय रक्तसंचार सेवा चितवनले स्थापना काल देखि नै बिरामीहरुलाई सेवा पुर्‍याउँदै आएको छ ।

नेपालमा एक उपचार केन्द्रको रुपमा स्थापित चितवनमा विभिन्न खालका बिरामीहरुलाई रगत उप्लब्ध गराई सेवा दिने कार्य क्षेत्रीय रक्तसंचार सेवा चितवनले गरेको छ ।

“नेपालीका लागि नेपाली” भन्ने भावनालाई आत्मसात गर्दै गैरआवासीय नेपाली संघले रक्तसंचार पद्धति कार्यदल स्थापना गरेको छ ।

यस कार्यदलले नेपालमा रगत सेवालाई गुणस्तरीय र सर्वसुलभ बनाउनको लागि रक्तसंचार क्षेत्रमा विभिन्न कार्यक्रम तथा परियोजनाहरु संचालन गरेको छ ।