काठमाडौं – नेपालका लागि १८ औं एसियन गेम्समा सहभागि भएका उसु खेलाडी वीरमान वाइवाको निधन भएको छ । काभ्रेस्थित आफ्नै घरमा सुतिरहेको अवस्थामा वाइवा मृतक भेटिएको पारिवारिक स्रोतले जनाएको छ ।

‘शनिबार राति अभ्यास गरेर घर आएपछि खाना खाएर सुतेका थिए । तर, बिहान ढिलासम्म नउठेपछि किन ढिला उठ्यो भनेर जाँदा मृत भेठिएका हुन्,’ वाइवाको पारिवारिक स्रोतले भन्यो, ‘राति सुत्दा सामान्य अवस्थामै थिए । तर, बिहान उठ्दा मृत्यु भइसकेको रहेछ ।’

वाइवा विभागिय टोली नेपाली सेनाको त्रिभुवन आर्मी क्लबका खेलाडी हुन् । इन्डोनेसियामा सम्पन्न १८ औं एसियन गेम्समा नेपालको प्रतिनिधित्व गरेका थिए ।

एसियन गेम्सको छनोट प्रतियोगिताका रुपमा रहेको राखेप च्याम्पियनसिपमा स्वर्ण पदक जित्दै उनी एसियन कपका लागि छनोट भएका थिए ।

उसुभन्दा अगाडि उनी नेपाल क्योकुशिन फुल कन्ट्याक्ट् कराते खेलाडी रहेको उनका सहकर्मी किरण सिंह साउदले बताएका छन् । वाइवा तेकोसिन करातेमा नेपालबाट १० पटकभन्दा बढी च्याम्पियन रहिसकेका छन् ।