काठमाडौं – कोरोना भाइरसको संक्रमण फैलनअघि नै विदामा नेपाल आएका श्रमिकलाई चाटर्ड विमानमार्फत दक्षिण कोरिया पठाउने तयारी भएको छ ।

माहामारीअघि बिदा लिएर दक्षिण कोरियाबाट नेपाल आइपुगेका तथा रोजगार अनुमति प्रणाली (इपीएस) को सबै कागजी प्रकिया पुगेका नेपाली श्रमिकलाई चाटर्ड विमानमार्फत कोरिया पठाउन लागिएको हो ।

यसका लागि नेपाल एयरलाइन्स र एनआरएनए केन्द्रीय कमिटीबीच सम्झौता भइसकेको एनआरएनए कोरियाका महासचिव डा. विमल सुवेदीले जानकारी दिए ।

नेपाल एयरलाइन्सको उक्त चाटर्ड विमान पहिलो चरणमा अप्रिल ३० तारिखमा नेपाली श्रमिक, विद्यार्थी तथा व्यवसायीलाई लिएर कोरियाका लागि उड्नेछ ।

लकडाउन हुनुअघि दक्षिण कोरियाबाट छोटो अवधिको बिदा लिएर नेपाल आएका श्रमिक अन्तर्राष्ट्रिय उडान प्रतिबन्ध भएपछि  कोरिया जान सकिरहेका थिएनन् ।

मन्त्रिपरिषद्को बैठकबाटै लकडाउन भएपनि कोरिया सरकारसँग छलफल गरी फर्किनुपर्ने नेपालीलाई कोरिया फर्कन मिल्ने निर्णय गरेको थियो ।

कोरिया फर्केपछि अनिवार्यरूपमा १४ दिनसम्म सेल्फ क्वारेन्टाइनमा बस्नुपर्ने नियम लागु गरिएको छ ।