दोहा : कुवेतमा पछिल्लो केही दिन यता विभिन्न कम्पनीमा कार्यरत नेपाली कामदारहरु अलपत्र पर्ने क्रम बढेको छ । काठमाडौँमा एसआरके तथा मदरल्याण्ड म्यानपावर मार्फत विभिन्न समयमा कुवेत पुगेका ८२ जना नेपाली कामदार अलपत्र परेका छन् ।

कुवेतस्थित वरबा ओइल सर्विसेस कम्पनी उनीहरु अलपत्र अवस्थामा रहेका छन् । कोरोनाका कारण सप्लाई कम्पनी बन्द भएपछि ६ महिनादेखि आफूहरु अलपत्र परेको पीडित मध्येका नवलपरासीका मुक्ति प्रसाद न्यौपानेले बताए ।

म्यानपावर कम्पनीले उनीहरुबाट प्रतिव्यक्ति १ लाख २० हजारदेखि १ लाख ६० रुपैयाँ लिएको थियो । तर मेनपावरले भने जस्तो कम्पनी काम र तलब दुवै दिएन । अहिले कम्पनी बन्द भएपछि ६ महिनादेखि न काम, न दाम भएर बस्नु परेको पीडितहरुको भनाइ छ ।

कम्पनीले लिएको साइट बन्द भएपछि कम्पनीले वेवास्ता गर्दा अलपत्र परेको उनीहरुले बताएका छन् । कम्पनी प्रशासनलाई कामको व्यवस्थापन गर्न वा आधामात्र भएपनि तलब दिन माग गर्दा पनि कम्पनी आश्वानबाहेक केहि नगरेकाले थप समस्यामा परेको उनीहरुले बताएका छन् ।

पीडितहरुका अनुसार मंगलबारसम्म कम्पनीले खान दिएको तर, बुधबारदेखि खाना दिन नसक्ने भन्दै खाना बन्द गरेको कारण आफूहरु थप समस्यामा परेको उनीहरुको गुनासो छ । कम्पनीले खाना बन्द गरेपछि भोकै हुने भइयो भन्दै उनीहरुले उद्धारको अपेक्षा गरेका छन् ।

आफूहरुलाई कम्पनीले खाना बन्द गरेपछि कुवेतस्थित नेपाली दूतावासलाई जानकारी गराएको र दूतावासले चाडै उद्दार तथा राहतको लागि पहल गर्ने आश्वासन दिएको उनीहरुले बताएका छन् ।

यसअघि पनि एसआरके नेपाल मेनपावर मार्फत कुवेत पुगेर बिचल्ली परेका ३३ नेपालीलाई एनआरएन कुवेतले खाद्यन सहयोग गरेको थियो । अझै उनीहरु पनि कुवेतमै विगत लामो समयदेखि उद्दारको पर्खाइमा छन् ।

अहिले उनीहरु धमाधम विरामी पर्न थालेका छन् । कुवेत लगायत खाडीका अन्य अरब देशहरुमा अलपत्र पर्ने नेपालीहरुको संख्या दिन प्रतिदिन बढिरहेको छ ।