काठमाडौं – राष्ट्रिय तथा अन्तर्राष्ट्रिय खेलाडी संघले एथलेटिक्स खेलाडी चन्द्रकला लामागादेमाथि हातपात गर्नेलाई कारबाहीको माग गरेको छ ।

बुधबार विज्ञप्ति जारी गर्दै संघले जातीय विभेदसहित लामागादेमाथि  कुटपिट भएको भन्दै दोषिलाई हदैसम्मको कारबाही गर्न माग गरेको हो ।

‘चन्द्रकला लामगादेमाथि जातीय  विभेदसहित कुटपिट  गरी सख्त  घाइते  बनाउने दुर्गा श्रेष्ठ र उनकी पत्नीलाई हदै सम्मको कार्वाहीको लागि सम्बन्धित निकायसमक्ष जोडदार माग गर्दछौ,’  संघका अध्यक्ष दिपक श्रेष्ठले जारी गरेको विज्ञप्तिमा भनिएको छ, ‘संबिधानले नै  जातीय दुर्ब्यवहारका घटनालाई  प्रतिबन्ध  गरेको र संबिधानले रोक  लगाएको यस्तो अमानवीय घटनाको नेपाल राष्ट्रिय तथा अन्तराष्ट्रिय खेलाडी संघ घोर भर्त्सना गर्दछ ।’

संघले सम्बन्धित संघ, राष्ट्रिय खेलकुद परिाषद् (राखेप) र युवा तथा खेलकुद मन्त्रालयलाई पनि खेलाडीको अवस्था बुझ्न र सहयोगका लागि अपिल गरेको छ ।

राष्ट्रिय कीर्तिमान कायम गरेकी खेलाडी लामगादे सातौं र आठौं राष्ट्रिय खेलकुदमा एथलेटिक्स सटफुटतर्फ र  ज्याब्लिन थ्रोकी स्वर्ण पदक बिजेता हुन् ।

सात महिनाकी गर्भवती उनीमाथि भएको कुटपिटको एथलेटिक्स संघले यसअघि नै विज्ञप्ति जारी गर्दै सम्बन्धित घटनामा संलग्न सबैलाई कारबाही गर्न माग गरिसकेको छ । एथलेटिक्स संघले उनलाई २१ हजार रूपैयाँ सहयोगसमेत गरेको छ ।