काठमाडौं – देशभर गरिएको लकडाउनका कारण फिल्मकर्मीहरु फुर्सदिला छन् । प्रायः कुनै न कुनै काममा व्यस्त रहने कलाकार यतिबेला फिल्म क्षेत्रका समस्या र विकृतिका बारेमा आवाज उठाउन थालेका छन् ।

नेपाली फिल्मकर्मीहरु यतिबेला नातावाद र कलाकारले पाउने पारिश्रमिकदेखि फिल्म क्षेत्रका मसिना समस्याहरुमाथि पनि छलफल गरेका छन् ।

नायिका सुरक्षा पन्त भने फिल्म क्षेत्रका मात्र विसङ्गतिमा केन्द्रित छैनिन् । उनले देशमा भइरहेको भ्रष्टाचार, सरकारको कार्यशैलीमाथि पनि प्रश्न उठाउने गरेकी छिन् ।

केही समयअघि कोरोना नियन्त्रण गर्न सरकार असफल भएको भन्दै सडकमा आन्दोलन गरेका युवाको पक्षमा पनि पन्तले आवाज उठाएकी थिइन् । सरकारलाई सचेत गराउनका लागि भन्दै उनले ‘इनफ इज इनफ’ भन्दै आन्दोलनमा उत्रेका युवाहरुको समर्थन गरेकी थिइन् ।

त्यसो त सुरक्षा करिअर शुरु गर्नुअघि पनि सरकारलाई सचेत गराउन आवाज उठाउने गर्थिन् । अहिले भने सुरक्षाले कोरोनाले निम्त्याएको विपदमा सरकारले गरेको लापरवाहीको विरोध जनाउन थालेकी छिन् । धेरैजसो कलाकारलाई खानपान र फिल्मबारे चासो छ । तर, सुरक्षाको भने राजनीतितर्फ बढी चासो देखिएको छ ।

केही समयअघि आन्दोलनका लागि तयार पारिएको ग्रुप ‘इनफ इज इनफ’ मा उनी मोडरेटर पनि थिइन् । पछि विवाद भएपछि उनी मोडरेटरबाट हटेकी थिइन् ।

यद्यपि सुरक्षाले सरकारलाई ‘अब त अति भयो’ भन्दै खबरदारी गरिरहेकी छिन् ।