काठमाडौं- नेपाली कांग्रेस नेता प्रकाशमान सिंहले राष्ट्रियतालाई बलियो बनाउन एक हुनुपर्ने बेला आएको बताएका छन् ।

सिंहले एक विज्ञप्ति जारी गर्दै नेपालको सीमामा अतिक्रमणपछि आफ्नो भूमि रक्षाको पक्षमा देश एकढिक्का भएका बेला राष्ट्रियतालाई बलियो बनाउन सबैमा अपिल गरेका छन् ।

कोरोनाको विपत्तिमा सरकारको तर्फबाट अझै ठोस प्रभावकारी जनअपेक्षा अनुरुपका कार्यक्रम ल्याउन नेता सिंहले सरकारको ध्यानाकर्षण गराएका छन् । स्वदेश तथा विदेशमा रहेका प्रत्येक नागरिकलाई सरकार अभिभावक हो भन्ने वोध हुने गरी काम गर्न उनले सरकारलाई सुझाव दिएका छन् ।

नेता सिंहले नेपालका लोकतन्त्रवादी श्रमजीवी पत्रकारहरूको संस्था नेपाल प्रेस युनियन स्थापनाको २९औं वर्ष प्रवेशका अवसरमा हार्दिक शुभकामना दिएका छन् ।

देशमा लोकतन्त्र स्थापना र जनताको हकअधिकारको पक्षमा खेल्दै आएको भूमिकाका लागि नेपाल प्रेस युनियनलाई धन्यवाद दिएका छन् ।

कोरोना भाइरसको कहरमा पनि आफ्नो पेशागत धर्म निर्वाह गरिरहेका पत्रकारहरूलाई सुरक्षित भएर कार्य गर्न सिंहले आग्रह गरेका छन् ।