काठमाडौं– सत्तारुढ दल नेकपा संसदीय दलका उपनेता सुवास नेम्वाङले प्रतिनिधिसभाको सभामुखमा आफूहरुले उपयुक्त पात्र चयन गरेको दाबी गरेका छन् ।

प्रतिनिधिसभाका सांसद अग्नि प्रसाद सापकोटालाई सभामुख चयन गरियोस् भन्ने प्रस्ताव आइतवार संसदमा राख्दै उपनेता नेम्वाङले सापकोटाको विकल्पमा अन्य कसैको उम्मेदवारी नपरेकाले उपयुक्त पात्र चयनलाई पुष्टि गरेको बताए ।

जेष्ठ सदस्य महन्थ ठाकुरको अध्यक्षतामा बसेको बैठकमा नेता नेम्वाङले भने,‘ हाम्रो चयन उपयुक्त रहेछ भन्ने निष्कर्षमा पुगेको छु । किनकी सभामुख चयनका लागि हामीले प्रस्ताव गरिरहेको यो क्षणमा संसदका कसैले पनि उहाँको विकल्पमा अर्को प्रस्ताव सार्नु भएको छैन यो सौभाग्य र संयोगको कुरा हो ।’

संसदमा सबैलाई मिलाएर लैजाने जिम्मेवारी अग्नि सापकोटाबाट बहन हुन्छ भन्ने विश्वासका साथ सापकोटालाई सभामुखका रुपमा प्रस्ताव गरेको उनले बताए ।