काठमाडौं – कोरोना भाइरसको संक्रमण फैलिन थालेपछि नेपालमा चैत्र ११ गतेदेखि लकडाउन गरियो । फिल्म हल लकडाउन हुनुभन्दा पहिले नै बन्द गरिएको थियो ।

लकडाउनका कारण कुनै पनि फिल्म रिलिज हुन सकेका छैनन् । रिलिज मिति कुरेर बसेका आधा दर्जन फिल्म रिलिज नै हुन पाएका छैनन् ।

फिल्म ‘म यस्तो गीत गाउँछु २’, ‘प्रेम गीत ३’ लगायत केही फिल्मले त प्रचारमा खर्च समेत गरिसकेका थिए । तर, फिल्म रिलिज हुन पाएनन् ।

वर्षभरि रिलिज हुने फिल्ममध्ये २/४ वटा फिल्मले बाहेक अरु फिल्मले भने व्यापार गर्दैनन् ।

नेपालमा वर्षेनी रिलिज हुने फिल्ममध्ये धेरै फिल्म रिलिज हुने डुब्ने गरेका छन् । फिल्म निर्माण गरेर प्रायः निर्माताले घाटा बेहोर्नुपर्ने अवस्था आउँछ भने कतिपय निर्माताको उठिबास हुने गर्छ ।

अहिले फिल्म नबन्दा राम्रा फिल्म बनाएर फाइदामा जाने निर्मातालाई बाहेक अरु निर्मातालाई भने फाइदा पुगेको छ ।

यदि लकडाउन नभएको भए यो समयसम्म कैयन् फिल्मको काम सकिएको हुन्थ्यो । कति फिल्म रिलिज भएर पनि घाटामा पुगिसकेका हुन्थे ।

यद्यपि फिल्म क्षेत्रलाई चलायमान बनाउन फिल्म निर्माण गर्नुपर्ने नै हुन्छ । अब फिल्मको बजार पहिलेभन्दा झनै खस्किएको छ । यसै पनि फ्लप हुने फिल्मलाई अब लगानी उठाउन झनै गाह्रो पर्ने देखिन्छ ।

अब निर्माण हुने फिल्म कस्ता बन्नेछन् र भोलि निर्माता गतवर्षझैं मारमा पर्नेछन् या नेपाली फिल्मले दर्शक बटुल्नेछन्, त्यसका लागि भने अझै केही समय कुर्नुपर्ने छ ।