काठमाडौं- सवारी व्यवसायीले अटोमोबाइलमैत्री मौद्रिक नीति ल्याउन माग गरेका छन्।

नाडा अटोमोबाइल संघ नेपालका प्रतिनिधिले नेपाल राष्ट्र बैंकका गभर्नर महाप्रसाद अधिकारीलाई भेटेर सवारी व्यवसायमैत्री मौद्रिक नीति ल्याउन माग गरेका हुन् ।

उनीहरूले राष्ट्रलाई आर्थिक समुन्नत र समृद्ध बनाउन सवारीसाधनको व्यापार अपरिहार्य रहेको बताए।

आगामी आर्थिक वर्ष २०७७/७८ को मौद्रिक नीतिले नेपालको समग्र अटोमोबाइल व्यवसायलाई प्रोत्साहन गर्नुपर्नेमा उनीहरूको जोड थियो।

निजी प्रयोजनका सवारीसाधनमा प्रवाह हुने कर्जा सीमा ५० प्रतिशतसम्म मात्र हुने व्यवस्थालाई पुनर्विचार गरी ९० प्रतिशत पुर्‍याउन माग गरेको संघले जनाएको छ।

भेटमा गभर्नर अधिकारीले अटोमोबाइल व्यवसायीलाई राहात महसुस हुने गरी मौद्रिक नीति ल्याउने प्रतिबद्धता जनाए।