काठमाडौं – निर्देशक निश्चल बस्नेत र स्वस्तिमा खड्काले कामको व्यस्तताका कारण एकअर्कालाई समय दिन पाएका थिएनन् । सरकारले मंगलवारदेखि लकडाउन गरेपछि उनीहरु फुर्सदमा छन् ।
निश्चल र स्वस्तिमा घरमा सेल्फ क्वारेन्टाइनमा बसेका छन् । यसअघि पनि स्वस्तिमाले सामाजिक सञ्जालमा लाइभ आएर सबैलाई कोरोना संक्रमणबाट सचेत हुन अनुरोध गरेकी थिइन् ।
यसैबीच स्वस्तिमाले लकडाउनका बेला घरको छतमा रमाइलो गरेको भिडियो शेयर गरेकी छिन् । उनले सामाजिक सञ्जालमा भिडियो शेयर गर्दै लेखेकी छिन्, ‘जब तपाईं घरमा ५ दिनभन्दा बढी बस्नुहुन्छ भने यस्तै हुन्छ, यतिबेला मसँग गर्नलाई केही छैन त्यसैले यो भिडियो मैले शेयर गरिरहेकी छु ।’
स्वस्तिमा अगाडि लेख्छिन्, ‘आशा छ, तपाईं पनि घरमा बसिरहनुभएको छ ।’
स्वस्तिमा ५ दिनदेखि घरमै क्वारेन्टाइनमा बसिरहेकी छिन् । यो भिडियोमार्फत स्वस्तिमाले निश्चलको प्रेम पनि झल्काएकी छिन् ।
निश्चल र स्वस्तिमाले एकसाथ अभिनय गरेको फिल्म ‘घामड शेरे’ केही महिनाअघि रिलिज भएको थियो । यो फिल्मले खासै चर्चा कमाउन सकेन ।
स्वस्तिमाको भूमिका रहेको फिल्म ‘चपली हाइट ३’ रिलिजका क्रममा थियो । तर सरकारले वैशाख १८ गतेसम्म फिल्म चलाउन रोक लगाएपछि फिल्मको प्रदर्शन मिति अनिश्चित बनेको छ ।
प्रतिक्रिया