कास्की- सुन्दर नगरी पोखराको प्रमुख विशेषताका रुपमा ताल तलैया मात्र नभएर धार्मिक पर्यटकका लागि पनि महत्वपूर्ण गन्तव्य बनेको छ ।

फेवा तालको तालबाराही, महेन्द्र गुफा, विन्दुवासिनी मन्दिर लगायत विश्व शान्ति स्तुप पनि धार्मिक पर्यटकको रोजाइमा पर्ने गरेका छन् ।

पोखरा महानगरपालिका २२ स्थित विश्व शान्ति स्तूप बौद्ध धर्मावलम्वीका लागि मात्र नभएर स्वदेशी तथा विदेशी पर्यटकको आकर्षणको केन्द्रविन्दु बन्न पुगेको छ ।

पोखराबाट करीब ८ किमी दक्षिणपश्चिममा रहेको स्तूपको उचाइ ११५ फिट तथा गोलाइ ३४४ फिट छ ।

शाक्यमुनि बुद्धको अस्थी धातु राखेर जापानी शैलीमा निर्मित स्तूप तथा आसपास क्षेत्र करीब बाइस रोपनी क्षेत्रफलमा फैलिएको छ । यस धार्मिक पर्यटकीयस्थलबाट माछापुच्छ्रे हिमाल, सराङकोट र फेवातालको दृश्यावलोकन गर्न सकिन्छ ।