रुपन्देही– रुपन्देही जिल्लाको सिद्धार्थनगर नगरपालिका १ डण्डाबाट तीन लाख भारतीय रुपैयाँसहित तीन जनालाई पक्राउ परेका छन् ।

सशस्त्र प्रहरीबल एपीएफ टोलीले उनीहरुलाई शुक्रवार नियन्त्रणमा लिएको हो ।

पक्राउ पर्नेहरुमा भारतको अयोध्या रामनगर कलौनी घर बताउने ५४ बर्षिय सुनिलकुमार रामानी, ५२ बर्षिय राजकुमार बरयानी र भारतकै उत्तर प्रदेश अकबरपुर जिल्ला अम्बेश्वर नगर भवानीपुर घर बताउने २२ बर्षिय रवि तिवारी छन् ।

भारतबाट नेपालतर्फ आउँदै गरेको यू पी ४५ यू ९०९० नम्बरको भारतीय गाडीमा सशस्त्र प्रहरी बल नेपाल नम्बर ३८ गुल्म हेक्वा रुपन्देहीबाट खटिएको एपीएफ टोलीले जाँच गर्दा उक्त रकम फेला परेपछि उनीहरुलाई पक्राउ गरिएको एपीएप्ले जनाएको छ।

एपीएफ टोलीले उनीहरुको साथबाट भारु पाँच सय रुपैयाँ दरको नोट पाँच सय ९० वटा र ५० रुपैयाँ दरको नोट एक सय वटा तथा १३ हजार नेपाली रुपैयाँ समेत बरामद गरेको छ ।

एपीएफ टोलीले पक्राउ परेकाहरुलाई बरामद रुपैयाँसहित आवश्यक कारवाहीको लागि राजश्व अनुसन्धान कार्यालय बुटवलमा बुझाएको जनाएको छ ।