काठमाडौं । देशको मुख्य प्रशासनिक केन्द्र सिंहदरबारको मूल प्रवेशद्वार, पश्चिम गेट, मा धेरै चहलपहल हुँदैन । दक्षिण गेट चल्तीमा आएपछि औपचारिक समारोहमा र विशिष्ट राजनीतिक पदाधिकारीका लागि मात्रै मूल द्वार प्रयोग हुन्छ ।

चल्तीमा नभएपछि नजर पनि कमै पर्ने भयो । यसपटक चार महिनाको लकडाउनमा त सिंहदरबारको मूल प्रवेशद्वार कुनै विरानो ठाउँ जस्तो देखिन थालेको थियो । गेट माथिसम्मै र भुइँ पनि लेउ र झारले हरियै देखिन थालेको थियो ।

यसरी मूल प्रदेशद्वार नै फोहोर र बिरानो देखिन थालेपछि काठमाडौं महानगरपालिकाले आज सफाइको काम गरेको छ । गेटको माथिल्लो भाग सफा गर्न डबल एक्स्टेन्सन ल्याडर प्रयोग गरिएको थियो ।

ढोकाको शिरसम्म पुग्न नसकिने र सुरक्षित नभएकोले दकमलबाट ल्याडर मगाएर माथिल्लो भागमा पलाएको झार सफा गरिएको थियो ।

ढोकाको बाहिरपट्टिको खाली जमिनमा बिछ्याइएका इटामाथि लेउ जमेर चिप्लो भएको थियो । झार पलाएर ढोकाका आकर्षण घटेको थियो ।

महानगरको वातावरण व्यवस्थापन विभागले करीब ४० जना कामकार खटाएर सिंहदरबारको मूल प्रवेशद्वार परिसर सफा गराएको हो ।