काठमाडौं– प्रधानमन्त्री केपी शर्मा ओली एवम् प्रमुख प्रतिपक्षी दल नेपाली कांग्रेसका सभापति तथा संसदीय दलका नेता शेरबहादुर देउवाबीच भेटवार्ता शुरु भएको छ ।

प्रधानमन्त्रीको सरकारी निवास बालुवाटारमा दुई नेताबीच भेटवार्ता शुरु भएको हो ।

प्रधानमन्त्री ओलीका प्रेस सल्लाहकार सूर्य थापाले प्रधानमन्त्री र विपक्षी दलका नेताबीच समसामयिक विषयमा छलफल चलिरहेको जानकारी दिएका छन् ।

पछिल्लो समय सरकारले ल्याएका २ वटा अध्यादेशको विषयलाई लिएर प्रतिपक्षी दल कांग्रेसले चर्को विरोध गर्दै आएको छ ।

प्रतिपक्षी कांग्रेससहित पार्टी भित्रैका अन्य शीर्ष नेताहरुको चर्को विरोध पछि प्रधानमन्त्री ओली विवादित २ वटा अध्यादेश फिर्ता लिन तयार भएका थिए ।

शुक्रबार बसेको मन्त्रिपरिषद बैठकले अध्यादेश फिर्ता लिने निर्णय गरेसँगै राष्ट्रपति विद्यादेवी भण्डारीले संवैधानिक परिषद र राजनीतिक दलसम्बन्धी २ वटा अध्यादेश खारेज गरिसकेकी छन् ।