म्यान्मारमा पहिलो पटक दुई जनामा कोरोना भाइरसको संक्रमण पुष्टि भएको छ । म्यान्मारका स्वास्थ्य अधिकारीहरुले विदेश भ्रमणबाट फर्किएका दुई म्यान्मारी नागरिकमा कोरोना भाइरसको संक्रमण पुष्टि भएको जनाएका हुन् ।

संक्रमितमध्येका एक २६ वर्षका व्यक्ति हालै बेलायतको भ्रमणपछि फर्केका थिए । अर्का ३६ वर्षे व्यक्ति अमेरिका भ्रमणपछि म्यान्मार फर्किएका थिए ।

दुईजनामा संक्रमण पुष्टि भएसँगै उनीहरूको सम्पर्कमा रहेका अन्यको पहिचान गर्ने काम भइरहेको म्यान्मारका स्वास्थ्य अधिकारीलाई उद्धृत गर्दै रोयटर्सले जनाएको छ ।

कोरोना भाइरसको उद्गमस्थल चीनसँग सीमा जोडिएपनि म्यान्मारमा यसअघिसम्म कोरोना भाइरसका संक्रमित पुष्टि भएका थिएनन् ।

कोरोना भाइरसको प्रकोपको रोकथामका लागि म्यान्मारले गत साता नै सबै सीमा नाकाहरु बन्द गर्ने घोषणा गरेको थियो भने भीडभाड नगर्न आह्वान गरिएको थियो ।