जलेश्वर– महोत्तरी जिल्ला सदरमुकाम जलेश्वरमा रहेको नेपाली सेनाको रणभीम गणले बिहीबार कोरोना भाइरससम्बन्धी प्रदर्शनी गरेको छ । मध्यपूर्वी पृतनाको आयोजनामा रणभीम गणले बिहीबार जिल्लाका सम्पूर्ण सरोकार पक्षलाई बोलाएर संक्रमण फैलिएमा रोकथाम, नियन्त्रण, यसबाट बच्न र बचाउने उपायबारे गणको परिसरमा प्रदर्शनी भएको हो ।

विभिन्न व्यक्तिले प्रयोग गर्ने ६ प्रकारका पीपीई तथा त्यसको प्रयोगको तरिका पनि प्रदर्शनीमा देखाइएको थियो । कोरोनाको संक्रमणबाट यदि कोही मानिसको मृत्यु भएमा मृत शरीर कसरी व्यवस्थापन गर्ने, परिवारजन संक्रमणबाट टाढा राख्ने, सान्त्वना दिने र अन्तिम संस्कार गर्नेसम्बन्धी विषय पनि प्रदर्शनीमा देखाइएको थियो ।

नेपालमा हालसम्म कोरोना संक्रमणबाट कसैको मृत्यु भएको छैन । यद्यपि स‌ंक्रमित भएका व्यक्तिको मृत्यु भएको अवस्था कसरी मृत शरीरकाे व्यवस्थापन तथा अन्तिम संस्कार गर्ने भनेर प्रदर्शनीमा ‘डेमो’ प्रदर्शन गरिएको सेनाको रणभीम गणले जनाएको छ ।