दोहा-काठमाडौँको भीमसेनगोला रहेको गोल्डेन इगल मेनपावरमार्फत बिगत ९ महिना अघि साउदी पुगेका २३ नेपाली कामदारको अवस्था दयनीय बन्दै गएको छ ।

कम्पनीले पाँच महिनादेखि तलब नदिएको र खान बस्नको लागि समेत समस्या भएकोले उनीहरुले गुनासो गरेका छन् । अहिलेसम्म कहि कतैबाट पनि सहयोग नपाएको उनीहरुको भनाइ छ ।

पीडितहरुका अनुसार नेपालबाट मेनपावर कम्पनीले साउदीको असासात अल शमाल कंस्ट्रकटिङ कम्पनी भनेर पठाएको तर साउदी आइपुगेपछि नास ट्रस्ट स्काफोलडिङ कम्पनीमा काम गर्न लगाएको पीडित नेपालीहरुले बताएका छन् ।

उक्त कम्पनीमा पुगेपछि केही महिना मात्र काम गरेका उनीहरुलाई पाँच महिना अघि सबैलाई कामबाट निकाली दिएको र तलब पनि नदिएको हुँदा अलपत्र अवस्थामा बस्नुपर्ने बाध्यता सिर्जना भएको पीडितले गुनासो पोखेका छन ।

म्यानपावर कम्पनीले आफूहरुबाट प्रतिव्यक्ति १ लाख २० हजार रुपैयाँ लिएको बताएका छन् । उनीहरुले  मेनपावरले भने जस्तो कम्पनी पनि नभएको र तलब पनि नहुँदा दुःख भएको बताएका छन् ।

म्यानपावरले खाने बस्ने सुबिधा सहित आठ घण्टाको १ हजार साउदी रियाल हुन्छ भनेर पठाएको भएपनि यहाँ कम्पनीले आठ घण्टाको ९ सय रियाल दिने गरेको थियो भने अहिले कम्पनी बन्द भएपछि ४ महिनादेखि न काम, न दाम भएर बस्नु परेको उनीहरुको भनाइ छ ।

बिरामी हुँदा समेत समान्य औषधि उपचार पनि नगरेको भन्दै कम्पनीले तलब पनि नदिने र घर फर्किने टिकट पनि नदिने बताएका छन्।

उनीहरुका अनुसार कम्पनी र मेनपावले जे मन लाग्यो गर्नु हामी केहि सहयोग गर्दैनौं भनेपछि आफूहरुले साउदीस्थित नेपाली दूतावासको शरणमा पुग्दा पनि कुनै सुनाई नभएको पिडितहरु बताउँछन् ।

यता, दूतावासले भने पीडितहरुले काम नभए बसेको धेरै समय भएको जनाउदै उद्धारको लागि कम्पनीसंग समन्वय गरिरहेको जनाएको छ ।

एनआरएनए साउदीले पनि नेपाली दूतावास र कम्पनीलाई उनीहरको समस्या तत्काल समाधान गर्न ताकेता गरिरहेको एनआरएनए मध्यपूर्व सहसंयोजक राजेन्द्र अर्यालले बताए।