काठमाडौं- बागमती नदीमा आएको बाढीका कारण काठमाडौंको त्रिपुरेश्वर आसपासको क्षेत्र डुबानमा परेको छ ।

बागमतीमा आएको बाढीले थापाथली, टेकु र त्रिपुरेश्वर आसपासका सुकुम्बासी बस्ती डुबानमा परेका हुन्। सो क्षेत्रमा बाढी पसेर घर तथा टहरा जलमग्न भएको प्रहरीले जनाएको छ ।

बाढीबाट हुन सक्ने सम्भावित दुर्घटनालाई मध्यनजर गर्दै उद्धारका लागि नेपाल प्रहरी र नेपाली सेनाको टोली खटिएको छ ।

लगातारको वर्षाका कारण काठमाडौं उपत्यकाका नदी तथा खोलामा ठूलो बाढी आएको छ। बागमती, विष्णुमति, मनोहरा, टुकुचा, धोबीखोला लगायतमा पानीको सतह निकै माथि पुगेको छ ।

बाढीका कारण काठमाडौंका अन्य स्थानमा पनि घरभित्र पानी पसेको छ । आज बिहान मात्रै गोकर्णमा बाढीले एउटा मोटरसाइकल बगाएको थियो ।