अस्ट्रेलिया- अस्ट्रेलियामा अध्ययनरत विद्यार्थीलाई सहायता उपलब्ध गराउने उदेश्यले अस्ट्रेलियन एजुकेशन कन्सलटेन्ट अलाइन्स ‘एका’ले ५ लाख डलरको कोष खडा गर्ने भएको छ ।

एका अस्ट्रेलियामा कार्यरत नेपाली शैक्षिक परामर्शदाताहरुको छाता संगठन हो ।

एकाले आफ्ना सदस्य कन्सलटेन्सी र क्राउड फन्डिङमार्फत कोषका लागि पैसा संकलन सुरु गरेको छ । आइतबार अनलाइन पत्रकार सम्मेलनको आयोजना गरेर एकाले आर्थिक सहायता लगायत अन्य सहयोगका बारेमा जानकारी गराएको हो ।

पत्रकार सम्मेलनमा एकाका अध्यक्ष पिआर अधिकारीले कोरोनाका कारण संकटमा रहेका विद्यार्थीका लागि पहिलो चरणमा तत्कालै एक लाख डलर सहायता उपलब्ध गराउने जानकारी गराए ।

एकाले नेपाल र अस्ट्रेलियामा रहेका शैक्षिक परामर्शदाताहरुलाई यो अभियानमा सहयोग गर्न समेत अनुरोध गरेको छ ।

सहयोग कोष निमार्णमा यथासक्य रकम संकलन गर्न र शैक्षिक संस्थाहरुसंग सहकार्य गर्न का लागि एकाले पूर्व अध्यक्ष विवेक थापाको संयोजकत्वमा समिति निमार्ण गरेको छ । एकाले शैक्षिक परामर्शका लागि विद्यार्थीले तिर्दै आएको सेवा शुल्कमा सहुलियत दिन समेत सबै सदस्य कन्सलटेन्सीलाई आग्रह गरेको छ ।

कोरोना भाइरस संक्रमण फैलिँदै जाँदा अस्ट्रेलियामा अध्ययन र रोजगारीका लागि पुगेका नेपालीहरु समस्यामा परेका छन् ।