एजेन्सी- आउँदो वर्षको अप्रिलसम्ममा कोरोना भाइरस विरुद्धको खोप उपलब्ध हुने अमेरिकी राष्ट्रपति ट्रम्पले दाबी गरेका छन् ।

शुक्रबार आयोजना गरिएको नियमित प्रेस ब्रिफिङमा ट्रम्पले वैज्ञानिकहरू निरन्तर खोपको काममा लागेकाले आउँदो अप्रिलसम्म अमेरिकामा खोप उपलब्ध हुने बताए ।

‘मेरो प्रशासनले यो खोप निर्माणको काम निकै द्रुत गतिमा गरेको छ र मलाई लाग्छ आगामी वर्ष सन् २०२१ को अप्रिलसम्ममा यो खोप तयार हुने छ,’ ट्रम्पले भने ।

खोप तयार हुनासाथै सबै अमेरिकी नागरिकलाई लगाइने पनि उनले जानकारी दिए । खोप हरेक महिनामा दशौँ लाख वटा उत्पादन हुने भएकाले सबै अमेरिकी नागरिकलाई केही महिनामा नै खोप लगाउन सकिने उनको भनाइ छ ।

‘अमेरिकाका वरिष्ठ चिकित्सक र वैज्ञानिकहरुले यो खोप आविश्कारको काममा लागेका छन् र उनीहरुले यो खोपको परीक्षण पनि अन्तिम चरणमा पुगेको बताएका छन्,’ ट्रम्पले भने ।