काठमाडौं – वरिष्ठ हास्यकलाकार मदनकृष्ण श्रेष्ठको आज जन्मदिन परेको छ । मह जोडीलाई नेपाली हास्यव्यङ्ग्य क्षेत्रको खम्बाका रुपमा पनि लिइन्छ ।

कोरोना भाइरसका कारण सरकारले गरेको लकडाउनका कारण सबै कलाकार घरमै बसिरहेका छन् । मदनकृष्ण श्रेष्ठ पनि परिवारका साथ घरमै आराम गरिरहेका छन् ।

हास्यअभिनेता श्रेष्ठलाई सेलिब्रेटी तथा प्रशंसकले भने सामाजिक सञ्जालमार्फत जन्मदिन शुभकामना दिएका छन् । मह जोडीका हरिवंश आचार्यले मदनकृष्ण श्रेष्ठलाई जन्मदिनको शुभकामना दिएका छन् ।

‘मदन दाइलाई जन्मदिनको धेरै धेरै शुभकामना,’ हरिवंश आचार्यले फेसबूकमार्फत जन्मदिनको शुभकामना दिँदै एउटै माला लगाएको तस्वीर शेयर गरेका छन् ।

यस्तै सीताराम कट्टेलले हास्य जगतका सम्राट भन्दै मदनकृष्ण श्रेष्ठलाई जन्मदिनको शुभकामना दिएका छन् । उनले लेखेका छन्, ‘हास्य जगतका सम्राट आदरणीय मदन दाइलाई जन्मदिनको अनगिन्ती शुभकामना ।’ यस्तै कुमार कट्टेलले पनि जन्मदिनको शुभकामना दिएका छन् ।

निर्देशक प्रदीप भट्टराईले जन्मदिनको शुभकामना दिँदै सुस्वास्थ्यको कामना गरेका छन् ।

‘आदरणीय मदनकृष्ण श्रेष्ठ दाइलाई सुखद जन्मदिनको अवसरमा हार्दिक मंगलमय शुभकामना व्यक्त गर्दछु,’ गायक रामकृष्ण ढकालले जन्मदिनको शुभकामना व्यक्त गरेका छन् ।

मदनकृष्ण श्रेष्ठले आफ्नो आत्मकथा ६ वर्ष लगाएर लेखेका थिए । उनको आत्मकथा ‘महको म’ लोकप्रिय छ ।

लामो समयदेखि पार्किन्सन रोगबाट ग्रसित मदनकृष्ण श्रेष्ठ पछिल्लो समय अभिनयमा खासै सक्रिय छैनन् । उनले नेवारी गीतमा पनि स्वर दिएका छन् । मदनकृष्ण श्रेष्ठ पेन्टिङमा पनि उत्तिकै रुचि राख्छन् ।