वीरगन्ज– लकडाउनका कारण प्रभावित दैनिक ज्यालादारी गर्ने व्यक्तिका परिवारलाई दिन खोजिएको राहात लुटपाट गर्ने ५ जना पक्राउ परेका छन् ।

पर्साको पर्सागढी गाउँपालिका–५ पचमुखी टोलमा वितरण गर्न खोजिएको राहात लुटपाट गर्नेलाई प्रहरीले पक्राउ गरेको हो ।

पक्राउ पर्नेमा पर्साको पर्सागढी गाउँपालिका–५ पचमुखी टोलमै घर भएका ५५ वर्षीय दर्शन रायभर, ४० वर्षीय चन्द्रिका पटेल, २८ वर्षीय श्याम कुमार शर्मा, २२ वर्षीय चन्द्रकिशोर साह र १८ वर्षीय सम्सुल हवारी छन् ।

जिल्ला प्रहरी कार्यालय पर्साका अनुसार शनिबार दिउँसो स्थानीय तहको समन्वयमा राहात वितरण गर्न खोज्दा उनीहरुले राहात वितरण गर्न आएको टोलीमाथि आक्रमण गरेका थिए ।

राहात वितरण गर्न आएको टोलीमाथि ढुंगामुडा गरेपछि उनीहरुले वितरण गर्न ल्याएको राहात लुटेर लगेका थिए ।

इलाका प्रहरी कार्यालय सुगौली र एकाटागाँबाट खटिएको टोलीले उनीहरुलाई शनिबार नै पक्राउ गरेको थियो । पक्राउ परेका पाँचै जनामाथि थप अनुसन्धान भइरहेको जिल्ला प्रहरी कार्यालय पर्साले जानकारी दिएको छ ।