एजेन्सी- विश्वव्यापी महामारीका रुपमा फैलिएको कोरोनाको त्रासमा विश्व छ । कोरोनाको संक्रमण फैलिएपछि विश्वका ६ लाख ३१ हजार बढी कोरोना संक्रमितहरु विभिन्न अस्पतालमा उपचार गराइरहेका छन् ।

सबैभन्दा बढी प्रभावित अमेरिका बनेको छ भने यूरोपेली मुलुकमा इटालीमा बढी बढी प्रभाव देखिएको छ । हालै इटालीको एउटा तस्वीर सामाजिक सञ्जालमा निकै भाइरल बनेको छ ।

कोरोना संक्रमित एक वृद्ध जोडीको तस्वीर भाइरल बनेको छ । उनीहरुले सघन उपचारक कक्ष (आईसीयू) मै आफ्नो विवाहको ५०औं वर्षगाँठ मनाएका हुन् ।

उनीहरूलाई वर्षगाँठ मनाउने व्यवस्था स्वास्थ्यकर्मीहरूले गरिदिएका थिए । ७१ वर्षीया सान्द्रा र उनका ७३ वर्षीय पति जियानकार्लोले अनुहारमा भेन्टिलेर भए पनि खाटबाट एकअर्काको हात समातेका थिए । फर्मो शहरको मुर्री अस्पतालमा यो घटना भएको हो ।

त्यस अस्पतालकी नर्स रोबर्ता फेर्रेतीले वृद्ध जोडीको ५०औं वर्षगाँठ आउन लागेको थाहा पाएपछि अन्य स्वास्थ्यकर्मीसँग मिलेर पार्टी आयोजना गरिन् । पार्टी १० मिनेट मात्र चलेको थियो । अस्पतालका कर्मचारीहरूले सुरक्षा कवच लगाएर वृद्ध जोडीलाई घेरेको र हातले प्रेमको चिह्न बनाएका थिए ।