काठमाडौं– युरोपमा कोरोना भाइरसको संक्रमण तीव्र बन्दै गएसँगै नेपाली दूतावासहरु धमाधम बन्द हुन थालेका छन् ।

दूतावास खोल्दा कर्मचारीबीच संक्रमण फैलन सक्ने भन्दै युरोपमा रहेका नेपाली दूतावासहरु बन्द हुन थालेको हो । केही दूतावासहरुले अत्यावश्यकबाहेका सेवाका लागि दूतावास नआउन यसअघिनै सूचनाहरु जारी गरिसकेका छन् ।

दूतावासहरुले अत्यावश्यक सेवा टेलिफोन, इमेल, इन्टरनेटबाट दिइरहेको जनाएका छन् ।

फ्रान्सको पेरिसमा रहेको नेपाली राजदूतावासले कोरोना भाईरस संक्रमणको कारण उत्पन्‍न आपतकालीन अवस्थाका कारणले अर्को सूचना नभएसम्म नेपाली दूतावास बन्द रहने सूचना निकालेको छ । उसले आपतकालिन सेवाका लागि सम्पर्क गर्नका लागि फोन नम्बर राखेको छ । कोरोना भाइरसको संक्रमण यतिबेला युरोपमा बढी देखिएको छ ।

बेल्जियमाको ब्रसेल्स्, स्विजरल्याण्डको जेनेभा लगायतका स्थानमा रहेका दूतावास बन्द रहेका छन् । यसअघि अस्ट्रेलियास्थित नेपाली राजदूतावासले अत्यन्त जरूरी अवस्थामा मात्र राजदूतावासमा सम्पर्क गर्न अस्ट्रेलियामा रहेका नेपालीहरुलाई आग्रह गरेको थियो । त्यस्तै यूएईस्थित नेपाली दूतावासले अत्यावश्यक बाहेकका सेवा अनिश्चितकालका लागि बन्द गरेको सूचना मंगलबार नै प्रकाशित गरेको थियो ।