काठमाडौं – नरेश कुमार केसीले फिल्म ‘निभ्न लागेको दियो’ निर्देशन गरेर चर्चा बटुले । हिमाली भेगको एक कथालाई उनिएको यो फिल्मले कैयन् फेस्टिभलमा सहभागिता जनायो । समीक्षकले रुचाएका यी निर्देशकले बनाएको दोस्रो फिल्म ‘रोमियो एण्ड मुना’ भने आशा गरिए अनुरुप चलेन ।

यो फिल्मको असफलतापछि निर्देशक केसीले नयाँ फिल्म बनाउन आँट गरिरहेका छैनन् । बरु उनी राम्रो स्किृप्टको खोजीमा छन् । हालै एक भेटका क्रममा निर्देशक केसीले सुनाए, ‘हामी नयाँ स्किृप्टको खोजीमा छौं, तर भनेजस्तो कथा नै पाइरहेका छैनौं ।’

उनले आफूले झण्डै २ दर्जन फिल्मको स्किृप्ट पढेको र चित्तबुझ्दो कथा नपाएको बताए ।

खबरहबसँगको भेटमा उनले भने, ‘राम्रो स्किृप्ट पायो भने फिल्म बनाउने हो, निर्माता हुनुहुन्छ तर राम्रो कथा पाइएन, नेपालमा राम्रो स्किृप्ट लेख्ने लेखकको कमी छ ।’

केसीले फिल्म ‘रोमिमो एण्ड मुना’ मा पनि नयाँ प्रयोग गर्न खोजेका थिए । चेतन, अचेतन र अवचेतन मनलाई बुझाउने गरी निर्माण गरेको फिल्मलाई आम दर्शकले रुचाएनन् । फिल्मले समीक्षा पनि औसत पायो । पछिल्लो समय भने निर्देशक केसीले फरक र स्तरीय फिल्म बनाउने सोचमा छन् ।