काठमाडौं– विहीवार युएईको अबुधावीमा भएको मिनिबस दुर्घटनामा मृत्यु हुने ६ जना मध्ये तीन जना नेपाली रहेको पुष्टि भएको छ । दुर्घटनामा ज्यान गुमाउने तीन जना नेपाली महिला रहेका छन् ।

मृत्यु हुनेहरुमा बाराको निजगढ नपा वडा नं.३ की अमिसा मोक्तान, प्यूठानकी भावना कुँवर र झापाकी कृष्ण कुमारी अधिकारी रहेका छन् ।

दुर्घटनामा परेर पाँच महिलासहित एक पुरुषको मृत्यु भएको आवुदावी प्रहरीले जनाएको छ ।  श्रीलंकाकी एक महिला र पाकिस्तानी गाडी चालक पुरुषको पनि दुर्घटनामा मृत्यु भएको छ । विहिवार विहानै भएको सो दुर्घटनामा परेर घाइते भएका अन्य पनि नेपाली रहेका छन् । हाल युएईका विभिन्न अस्पतालहरुमा गरी १४ जना नेपालीको उपचार भइरहेको छ ।

प्रवासी कामदार बोकेको बस र मालवाहक ट्रक एक आपसमा ठोक्किँदा दुर्घटना भएको जनाइएको छ । स्थानीय प्रहरीले लापरवाहीपूर्ण ड्राभिङका कारण दुर्घटना भएको जनाएको छ ।

युएईका लागि नेपाली राजदूत कृष्णप्रसाद ढकालले दुर्घटनामा परेको बसमा १८ जना नेपाली सवार रहेको जानकारी सामाजिक सञ्जालमार्फत दिएका थिए ।