काठमाडौँ- आज यमपञ्चकको मुख्य तथा अन्तिम दिन भाइटीका । बिहान ११ बजेर ३७ मिनेटको उत्तम साइतपछि दिदीबहिनीले दाजुभाइलाई टीका लगाइरहेका छन् ।

दाजुभाइ नहुनेले काठमाडौँको रानीपोखरीका बीचमा रहेको बालगोपालेश्वर मन्दिरमा पुगेर टीका लगाइरहेका छन् ।

भूकम्पले क्षतिग्रस्त मन्दिर पुनःनिर्माण सम्पन्न भएसँगै पाँच वर्षपछि बालगोपालेश्वर मन्दिर पुगेर टीका लगाउनेको चहलपहल बढेको छ ।

भाइटीका लगाउन रानीपोखरी पुगेकाहरूले स्वास्थ्य सावधानीका उपायस्वरूप मास्क लगाएका छन् ।

बालगोपालेश्वर मन्दिर वर्षमा एकपटक आजैका दिन मात्र खुल्ने गरेकोमा यो वर्ष कतिपय नेवार समुदायले भोलि पनि टीका लगाउने भएकाले मन्दिर मंगलबार पनि खुल्नेछ ।

विसं २०३५ पछि नियमित रुपमा रानीपोखरीभित्रको बालगोपालेश्वर मन्दिर खुल्न थालेको हो ।