काठमाडौं – नेपाली विद्युत प्राधिकरणका कार्यकारी निर्देशक कुलमान घिसिङ आफ्नो ४ वर्षे कार्यकाल सकेर मंगलवार बिदा भए ।

उनको पुनःनियुक्तिको माग गर्दै कलाकारहरुले पनि आवाज उठाएका थिए । जनस्तरबाट कुलमान घिसिङलाई पुनः कार्यकारी निर्देशकमा नियुक्ति गर्नुपर्ने आवाज उठेको थियो ।

कुलमानले चार वर्षमा अर्बौं घाटामा रहेको संस्थालाई नाफामा पुर्‍याएका थिए भने घण्टौंसम्म हुने लोडसेडिङ पनि उनकै पालामा हटेको थियो ।

गायक अमृत गुरुङले कुलमानलाई पुनःनियुक्ति नदिएको समाचारले आफू दुःखी भएको बताएका छन् । उनले सामाजिक सञ्जाल फेसूबकमार्फत आफ्नो विचार व्यक्त गर्दै कुलमानको बिदाइको समाचारले खिन्न भएको बताएका हुन् ।

‘अस्ति कुलमान फेरि नियुक्त हुने समाचारले खुशी भएको थिएँ, अहिले कुलमानको बिदाइको समाचारले खिन्न भएँ,’ अमृत गुरुङ भन्छन्, ‘म उनलाई चिन्दिनँ, मैले उनको काम चिनेको हुँ, राम्रो गर्नेलाई राम्रो भन्दा इर्ष्याको शिकार हुने परिपाटी शुरु भएको हो भने अब त्यो पनि भन्न भएन, यो स्वतन्त्रता छिनेकोमा धन्यवाद सरकार ।’