काठमाडौं– नेपालमा थप एकजना कोरोना संक्रमितको मृत्यु भएको छ ।

धनुषाको जनकपुरधाममा रहेको एक निजी अस्पतालमा मृत्यु भएका पुरुषमा कोरोना पुष्टि भएको स्वास्थ्य निर्देशनालय प्रदेश २ का वरिष्ठ जनस्वास्थ्य प्रशासक डाक्टर विजयकुमार झाले जानकारी दिए ।

डा. झाका अनुसार मृतक पुरुष जनकपुरधाम उपमहानगरपालिका–४ का ४३ वर्षका पुरुष हुन् । उनमा सुगरको समस्या थियो ।

उनलाई सुगरको लेवल बढेको र श्वसप्रश्वासमा समस्या देखिएपछि साउन ३० गते जनकपुर उपमहानगरपालिकामा रहेको काव्या अस्पतालमा लगिएको थियो ।

उनको सोही अस्पतालको भेन्टिलेटरमा राखेर उपचार गरिएको र उपचारकै क्रममा शनिबार बिहान ८ बजे मृत्यु भएको झाले बताए ।

उनको मृत्युपछि स्वाब संकलन गरी कोरोना परीक्षण गर्दा रिपोर्ट पोजेटिभ आएको डा झाले बताए ।

‘उहाँमा पहिलादेखि नै सुगरको समस्या रहेछ, सुगर लेवल उच्च भएको र श्वासप्रश्वासमा समेत समस्या भएपछि काव्या अस्पतालमा गरिएको थियो,’ डा झाले भने, ‘ उहाँको भेन्टिलेटरमा राखेर उपचार भइरहेको अवस्थामा ३१ गते बिहान ८ बजे मृत्यु भयो । मृत्युपछि कोरोना परीक्षण गरिएकोमा अहिले रिपोर्ट पोजेटिभ आयो ।’

अस्पतालले उनको कोरोनाले मृत्यु भएको पुष्टि गरेपनि स्वास्थ्य मन्त्रालयले भने पुष्टि गर्न बाँकी छ ।

मन्त्रालयले पछिल्लो तथ्यांक अनुसार नेपालमा कोरोनाले ज्यान गुमाउनेको संख्या १०४ पुगेको छ ।

कोरोनाले ज्यान गुमाउनेहरुको प्रदेशगत विवरण

प्रदेश नं. १ – ९ पुरुष,१ महिला

प्रदेश नं. २ – ३४ पुरुष, ११ महिला

बाग्मती प्रदेश- १३ पुरुष, ५ महिला

गण्डकी प्रदेश- ६ पुरुष

प्रदेश नं. ५ – १० पुरुष, ३ महिला

कर्णाली प्रदेश – ४ पुरुष

सुदूरपश्चिम प्रदेश- ५ पुरुष र ३ महिला

हालसम्म जम्मा ८१ पुरुष र २३ महिला गरी १०४ जनाको कोरोनाले मृत्यु भएको छ ।