एजेन्सी – बेलारुसमा सरकारी टेलिभिजनविरूद्ध हजारौँले प्रदर्शन गरेका छन् ।

समाचार प्रसारणमा पक्षधरता देखाएको भन्दै प्रदर्शनकारीहरूले सरकारी टेलिभिजनअघि प्रदर्शन गरेका हुन् ।

राष्ट्रपतीय चुनावमा धाँधली भएको भन्दै सुरू भएका प्रदर्शनको समाचार नै प्रसारण नभएको तथा राष्ट्रपति एलेक्सान्डर लुकाशेन्कोको पक्षमा मात्र समाचार सामग्रीहरू प्रस्तुत गरिएको भन्दै प्रदर्शनकारीहरूले विरोध जनाएको बीबीसीले जनाएको छ ।

यही अगस्ट ९ मा भएको चुनावमा राष्ट्रपति लुकाशेन्कोले जितेको घोषणा गरिएपछि बेलारूसमा प्रदर्शन हुँदै आएको छ ।

सन् १९९४ देखि सत्तामा रहँदै आएका लुकाशेन्कोले अगस्ट ९ मा भएको चुनावमा ८०.१ प्रतिशत मत पाएको बेलारुसको निर्वाचन आयोगले घोषणा गरेको थियो । लगत्तै विपक्षी उम्मेदवारहरूले फेरि मतगणनाको माग गर्दै आएका छन् ।