काठमाडौं– ललितपुर महानगरपालिकाले ललितपुर क्षेत्रका फुटबल क्लबलाई नगदसहित सम्मान गरेको छ ।

आइतबार ललितपुर महानगरपालिकाका मेयर चिरिबाबु महर्जनले गत वर्ष घोषणा गरे बमोजिम यस वर्ष ए डिभिजन, बी डिभिजन र सी डिभिजन क्लबलाई नगदसहित सम्मान गरेका हुन् ।

सम्मानित हुनेमा ए डिभिजन क्लब थ्री स्टारले सबैभन्दा धेरै १६ लाख रुपैयाँ प्राप्त गरेको छ । ललितपुर महानगरपालिका ए डिभिजन क्लबलाई वार्षिक ४ लाख र नकआउट प्रतियोगितामा उपाधि जितेमा थप ४ लाख रुपैयाँका दरले रकम दिएको छ। थ्री स्टार वार्षिक ४ लाख र तीन नकआउट प्रतियोगिता जितेवाफत थप १२ लाख रुपैयाँ पाएको हो ।

यस्तै च्यासल युथ क्लबले दुई प्रतियोगिता जितेबापत ८ लाख र वार्षिक रकम ४ लाखसहित १२ लाख रुपैयाँ प्राप्त गर्‍यो । यस्तै एक प्रतियोगिता जितेको जाउलाखेल युथ क्लबले ८ लाख पायो भने फ्रेण्ड्स र ब्रिगेड ब्वाइज क्लबले ४ लाख प्राप्त गरे ।

यस्तै, महानगरपालिकाले बी डिभिजनका सातदोबाटो, पुल्चोक, खुमलटार र झम्सीखेल गरी ४ क्लबले ३–३ लाख रुपैयाँ प्रदान गर्दा सी डिभिजनका दुई क्लब सानेपा र खालीबारीले २–२ लाख नगदसहित सम्मान गरेको हो ।