कास्की- गण्डकी प्रदेशमा आज १ सय ६९ जनामा कोरोना भाइरसको संक्रमण पुष्टि भएको छ ।

गण्डकी प्रदेश स्वास्थ्य निर्देशनालयले विहान ६ बजेदेखि अहिले साँझ सवा ५ बजेसम्म पटक-पटक गरी जारी गरेको विज्ञप्ति अनुसार पछिल्लो २४ घण्टामा १ सय ६९ जनामा संक्रमण पुष्टि भएको हो ।

गण्डकी प्रदेशमा यो तथ्यांक अहिलेसम्मकै सबैभन्दा बढी भएको निर्देशनालयले जनाएको छ ।

सबैभन्दा बढी नवलपरासीपूर्वमा ५८ जना, बाग्लुङमा ५१, तनहुँमा ११, गोरखामा ७, म्याग्दीमा ४ र लमजुङमा ३ जना संक्रमित थपिएका छन् ।

निर्देशनालयले गरेको पछिल्लो अध्यावधिक विवरणअनुसार गण्डकी प्रदेशमा अहिलेसम्म संक्रमित हुनेको संख्या ५ हजार ३ सय ६ पुगेको छ ।

यसैबीच, तनहुँ जिल्ला, ब्यास नगरपालिका– ३ का ६५ बर्षीय कोरोना संक्रमित पुरुषको गएराति मृत्यु भएको छ ।

ती पुरुषको राति ११ बजेर ५० मिनेटमा गण्डकी मेडिकल कलेज, पोखराको भेन्टिलेटरमा उपचारको क्रममा मृत्यु भएको गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा. विनोद विन्दु शर्माले जानकारी दिए ।

योसँगै गण्डकी प्रदेशमा कोरोनाको संक्रमणबाट मृत्यु हुनेको संख्या ४७ पुगेको छ ।