काठमाडौं – गैर आवासीय नेपाली संघ (एनआरएनए) खेलकुद प्रतिष्ठानले नेपालका राष्ट्रिय तथा अन्तर्राष्ट्रिय खेलमा प्रतिनिधित्व गर्ने खेलाडीको कोरोना बीमा गर्ने भएको छ ।

एनआरएनएले मंगलबार विज्ञप्ति जारी गर्दै १३ औं दक्षिण एसियाली खेलकुद र नेपालगन्जमा सम्पन्न आठौं राष्ट्रिय खेलकुदका स्वर्ण, रजत र कास्य विजेता खेलाडीको कोरोना बीमा गर्ने जानकारी दिएको छ।

नेपाली खेलकुदमा समाहित खेलाडी परिवारलाई कोरोना महामारीको जोखिममा राहत पुगोस भन्ने उद्देश्यले बीमा गर्न लागिएको विज्ञप्तिमा भनिएको छ।

एनआरएनएले १३ औ दक्षिण एसियाली खेलकुदमा स्वर्ण, रजत र काश्य पदक प्राप्त गर्ने नेपाली खेलाडी र सो खेलसँग सम्बन्धित सम्पूर्ण प्रशिक्षकहरुको साथै गत वर्ष सम्पन्न ८ औं राष्ट्रिय खेलकुदमा स्वर्ण, रजत र काश्य पदक बिजेता सम्पूर्ण खेलाडीहरुको कोरोना बीमा गर्ने जनाएको छ ।

यस्तै संघले कोरोना बीमाका लागी आवश्यक समन्वय गरिदिन नेपाल ओलम्पिक कमिटी, राष्ट्रिय खेलकुद परिषद र सम्बन्धित खेलका राष्ट्रिय संघलाई अनुरोध गर्दै सम्बन्धित प्रशिक्षक र खेलाडीहरुले आ–आफनो खेल र प्राप्त पदकको विवरणसहित नागरिकताको प्रतिलिपि यथा सीघ्र उपलव्ध गराउन माग गरिएको छ ।