काठमाडौं – अमेरिकाको एक कम्पनीले कोरोना भाइरस (कोभिड–१९) निष्क्रिय पार्ने औषधि तयार पारेको दाबी गरेको छ ।

युनिभर्सिटी अफ पिटर्सवर्ग स्कूल अफ मेडिसिनका वैज्ञानिकहरुले कोरोना भाइरस निष्क्रिय पार्ने औषधिको विकास गरेको बताएको अन्तर्राष्ट्रिय सञ्चार माध्यमले उल्लेख गरेका छन् ।

सेल नामक जर्नलमा प्रकाशित लेखका आधारमा सो औषधिको विकासबारे अमेरिकाको समाचार संस्था फक्स न्यूजले समाचार तयार पारेको छ ।

वैज्ञानिकहरुका अनुसार यो औषधिले मान्छेमा कुनै साइड इफेक्ट नगर्ने र यसलाई निकै सानो बायोलोजिकल कणबाट निर्माण गरिएको बताइएको छ ।

वैज्ञानिकहरुले यसलाई सार्स–कोभ २ नाम दिएका छन् । यो औषधि परीक्षणका क्रममा मुसा र ह्याम्स्टर्समा प्रभावकारी भएको बताइएको छ ।

समाचारका अनुसार यो औषधिले बिरामी निको हुनुका साथै पछि कोरोना संक्रमण नहुने पनि जनाइएको छ ।

युनिभर्सिटी अफ टेक्सस मेडिकल ब्रान्च सेन्टर फर बायो डिफेन्स एण्ड इमर्जिङ डिजिजेस र गालभेस्टन नेशनल ल्याब्रोटरीका प्रतिनिधिहरुले मुसामा यो औषधिको परीक्षण गर्दा मुसामा सेल्स भाइरस प्रवेश गर्न नदिएको बताएका छन् ।

यो औषधि कहिलेदेखि सर्वसाधारणका लागि उपलब्ध हुनेछ भन्नेबारेमा भने अझै खुलाइएको छैन ।