कायरो– इजिप्टमा पहिलो पटक कोरोना भाइरसको संक्रमण फेला परेको छ ।

यससँगै चीनबाट शुरु भएको कोरोनाभाइरसको संक्रमण पहिलो पटक अफ्रिकी महादेशमा पनि देखा परेको हो । इजिप्टको स्वास्थ्य मन्त्रालयले जनाएअनुसार कोरोनाभाइरसको संक्रमण देखा परेका व्यक्ति विदेशी नागरिक हुन् ।

उनको राष्ट्रियता वा अन्य कुनै किसिमका पहिचान भने खुलाइएको छैन । संक्रमित व्यक्तिलाई अस्पतालमा अरु बिरामीबाट अलग्गै राखेर उपचार भइरहेको छ ।

ती व्यक्तिमा गरिएको परीक्षणमा कोरोनाभाइरसको सकारात्मक नतिजा आएपनि उनमा कोरोनाभाइरसको गम्भीर लक्षण भने नदेखिएको जनाइएको छ ।

वैज्ञानिकहरुले चीनको मध्य हुबेई प्रान्तबाट शुरु भएको प्राणघातक कोरोनाभाइरसको नाम कोभिद–१९ राखेका छन् । यस भाइरसको संक्रमणबाट हालसम्म १५ सय भन्दा धेरैको ज्यान गइसकेको छ भने अरु हजारौं संक्रमित भइसकेका छन् ।

चीनबाहेक भाइरसको संक्रमण दुई दर्जनभन्दा धेरै मुलुकमा देखा परिसकेको छ ।