पेरिस– एशियाबाहिर पहिलो पटक कोरोनाभाइरसका कारण एक जनाको मृत्यु भएको छ ।

युरोपेली मुलुक फ्रान्समा कोरोनाभाइरसका कारण एक जनाको ज्यान गएको हो । फ्रान्सकी स्वास्थ्यमन्त्री आग्नेस बुज्युनले जनाएअनुसार कोरोनाभाइरसको संक्रमणबाट उपचार गराइरहेका एकजना चिनियाँ पर्यटकको ज्यान गएको हो ।

उनका अनुसार उत्तरी पेरिसको बिसा अस्पतालमा उपचाररत ८० वर्षे चिनियाँ पर्यटकको ज्यान गएको हो । उनलाई गत जनवरी २५ देखि उपचार गरिरहेको जनाइएको छ ।

कोरोनाभाइरसबाट फोक्सोमा संक्रमण भएका कारण उनको ज्यान गएको एएफपीले जनाएको छ ।

चीनबाट शुरु कोरोनाभाइरसबाट हालसम्म करिब १४ सय जनाको ज्यान गइसकेको छ भने अरु हजारौं संक्रमित भएका छन् ।

यसबाट फ्रान्ससहित जापान, हङकङमा र फिलिपिन्समा एक–एक जनाको ज्यान जानुबाहेक बाँकी सबै ज्यान गुमाएका घटना चीनका छन् ।

हालसम्म विभिन्न २४ मुलुकका कोरोनाभाइरसको संक्रमण देखा परेको छ । फ्रान्समा यसअघि ११ जनामा कोरोनाभाइरसको संक्रमण देखा परेको थियो ।