काठमाडौँ- हरेक गर्भवती महिलाले गर्भमा हुर्किरहेको बच्चा स्वस्थ जन्मियोस् भन्ने कामना गर्छन् । आफ्नो बच्चामा जन्मजात कुनै स्वास्थ्य समस्या नहोस् भन्ने उनको चाहना हुन्छ ।

गर्भावस्था हरेक महिलाका लागि विशेष रहन्छ । जन्मने सन्तान बारेको कौतुहलताले उनीहरुको मनलाई रोमाञ्चीत बनाइदिन्छ । तर, हरेक महिलाको मनमा एउटा डर भने हुन्छ, बच्चा कस्तो जन्मन्छ ? कुनै अपाङ्गता त हुदैँन ?

गर्भवती महिलालाई यो चिन्ता हुनु स्वाभाविक हो ।  चिकित्सकका अनुसार गर्भावस्थामा हुने सानो गल्तीले पनि बच्चा अपांग हुन सक्छ ।

पर्याप्त पौष्टिक आहार नलिनाले, क्याल्सियम र भिटामिन डिको कमीले गर्भमा हुर्किरहेको शिशुमा केही कमीहरु देखिन्छन् । गर्भावस्थामा निम्न कुरालाई ख्याल नराखे शिशु अपाङ्ग जन्मन सक्छ ।

१. गर्भाधारणको चाहाना भएका महिलाले ३ महिना पहिलेदेखि नै थाइराइड, सिस्ट आदिको परीक्षण गराउनु पर्दछ ।

२. गर्भावस्थाको ३ महिना पहिलेदेखि नै महिलाहरुले फोलिक एसिडको सेवन गर्नुपर्छ । फोलिक एसिडको सेवनले बच्चा र आमामा रगतको कमी हुँदैन ।

३. गर्भावस्थाको क्रममा महिलाले भाइरल इन्फेक्सनबाट बच्नु पर्दछ । त्यसैले गर्भवती महिला भीडभाडमा नजानु नै राम्रो हुन्छ ।

४. गर्भावस्थाको क्रममा महिलाहरुलाई धेरै होहल्लाको वातावरणमा बस्न दिनु हुँदैन । यसले बच्चाको सुन्ने शक्ति कम हुन सक्छ ।

५. ध्वनी प्रदुषणमा हुर्किएको बच्चामा श्रवण शक्ति मात्र नभई बोल्ने क्षमतामा पनि असर पर्दछ । किनभने बच्चाले केही नसुने उच्चारण क्षमता हुँदैन ।

६. गर्भवती महिलाले मदिरा, धुम्रपान सेवनको लत छाड्नु पर्दछ । मदिराको सेवनले गर्भ तुहिने र भ्रुणको विकास रोकिन सक्छ । धुम्रपानको लतले बच्चाको तौल कम हुनसक्छ ।

७. गर्भावस्थामा प्याकेज्ड जुस, कोल्ड ड्रिंक्स, बाहिरको खाना खानु हुदैँन । साथै चटपटे, अत्याधिक पिरो अमिलो खानु हुदैँन । तसर्थ जिब्रोलाई नियन्त्रणमा राख्नुपर्छ । अझ सकेसम्म पिज्जा, बर्गर, स्ट्रिट फुड, चटपटे, पानीपुरी सेवन नगरेकै राम्रो ।-एजेन्सीको सहयोगमा