दोहा- कोरोना सङ्क्रमित बढेसंगै कुवेत सरकारले मास्क नलगाउने तथा जनस्वास्थ्य मापदण्ड उल्लंघन गर्नेलाई तत्काल जरिवाना लगाउने सम्बन्धी मस्यौदा मन्त्रिपरिषदमा पेस गरेको छ ।

उक्त मस्यौदामा मास्क नलगाउनेलाई तत्काल ५० देखि १०० दिनारसम्म जरिवाना हुने व्यवस्था प्रस्ताव गरिएको कुवेतको कोरोना भाइरस संकट व्यवस्थापन समितिले जनाएको छ ।

कुवेतमा पछिल्लो २४ घण्टामा ८४४ जना नयाँ संक्रमित थपिएसँगै संक्रमितको संख्या १ लाख १२ हजार ७३७ पुगेको कुवेतको स्वास्थ्य मन्त्रालयले जनाएको छ ।

अहिलेसम्म उपचारपछि निको हुनेको संख्या १ लाख ४ हजार ५०८ पुगेको छ ।

यस्तै कुवेतमा कोरोनाले ६७२ जनाले ज्यान गुमाईसकेको मन्त्रालयले जनाएको छ ।

कुवेतले सुरुवाती चरणमा सङ्क्रमित नेपालीको संख्या खुलाए पनि पछिल्लो समयमा राष्ट्रियतबारे केहि खुलाएको छैन् ।

कुवेतमा के कति नेपाली श्रमिक कोरोनाबाट संक्रमित छन् भन्ने बारे कुवेतस्थित नेपाली दूतावाससंग पनि तथ्यांक छैन ।

यस्तै कुवेतले कोरोना महामारीका कारण नेपाल माथि लगाएको प्रतिबन्ध अझै हटाएको छैन ।

नेपालबाट कुवेत फर्किनेहरु संयुक्त अरब एमिरेट्स (यूएई) हुँदै त्यहाँ १४ दिन क्वारेनटाइमा बसेर कुवेत जाने गरेका छन् । यसरी फर्किदा दुई लाखसम्म खर्च हुने गरेको उनीहरु बताउँछन् ।