काठमाडौं – म्युजिक भिडियोमा राष्ट्रिय झण्डा जलाएको दृश्य राखेको आरोपमा पक्राउ परेका गायक ग्याल्जेन दोर्जे तामाङलाई पुर्पक्षका लागि थुनामा राख्न अदालतले आदेश दिएको छ ।

सोमवार जिल्ला अदालत काठमाडौंका न्यायाधीश विनोदकुमार पोखरेलको इजलासले तामाङलाई थुनामा राख्न आदेश दिएको हो ।

यसअघि राष्ट्रिय झण्डा जलाएको आरोपमा पक्राउ परेका अन्य ३ जना भने जनही १५ हजार धरौटीमा रिहा भएका छन् । यस्तै अन्य ५ जना साधारण तारेखमा छुटेका छन् ।

युट्युबमा मंगोलहप देशद्रोही बोलको गीत अपलोड गरेपछि आफूलाई र्‍यापर भनेर चिनाउने ग्याल्जेनको चौतर्फी विरोध भएको थियो ।

यो बहस राष्ट्रिय चासोको विषय बनेपछि प्रहरीले ग्याल्जेनसहित ९ जनालाई पक्राउ गरेको थियो ।  उनीहरूविरुद्ध भदौ २४ गते अदालतमा मुद्दा दायर गरिएको थियो ।

मकवाननपुरको एक स्कूलमा छायांकन गरिएको उक्त गीतमा नेपालका नेतादेखि क्षेत्री बाहुनसम्मलाई तल्लो स्तरको भाषा प्रयोग गर्दै गाली गरिएको थियो ।

उक्त म्युजिक भिडियोको करीब ४० सेकेन्डदेखि नेपालको राष्ट्रिय झण्डा जलाएको दृश्य छ । भिडियो मकवानपुरको वागमती गाउँपालिका–३ स्थित सल्लेनीको विष्णु आधारभूत विद्यालयमा खिचिएको थियो ।

म्युजिक भिडियोमा साम्प्रदायिकता माथि नै खलल पुग्ने किसिमका भनाइहरू भएका कारण सामाजिक सञ्जालमा चर्को आलोचना भएको थियो ।