धेरैले बुझेको कुरा के हो भने सुन, चाँदी र हीरा संसारमा सबैभन्दा महंगो चीज हो । तर, ब्रह्माण्डमा यस्तो चीज पनि छ जसको मूल्य तपाईंले सोचेभन्दा निकै धेरै छ ।

एन्टीम्याटर (प्रतिपदार्थ) नामक पदार्थको मूल्य एक ग्रामको ८ हजार अर्ब (प्रतिग्राम ८० खर्ब रुपैयाँ) पर्छ । यसको मूल्य सुनेर कमैलाई मात्र विश्वास लाग्ने गर्छ ।

विज्ञानका विद्यार्थीले भने यसको नाम सुनेका हुन्छन् । वैज्ञानिकका अनुसार यो प्रतिपदार्थमा विद्युत पनि उल्टो बग्छ । त्यसलाई विशेष रुपले मात्र हेर्न सकिन्छ ।

यो महंगो मात्र छैन, उत्तिकै रहस्यमयी पनि मानिएको छ । वैज्ञानिकहरुले एन्टी म्याटर सामान्य पदार्थ भए पनि यसको गुण विपरीत हुने बताएका छन् ।

वैज्ञानिकहरुका अनुसार ब्रम्हाण्डको उत्पतिका रूपमा मानिएको बिग ब्याङपछि पदार्थसँगै प्रतिपदार्थ पनि निर्माण भएको थियो । यसको खोजी भएसँगै यो रहस्यमयी बनेको बताइन्छ ।

तर, कतिपयले भने प्रतिपदार्थलाई काल्पनिक पदार्थ मान्ने गरेका छन् । तर संसारमा प्रतिपदार्थको अस्तित्व रहेको वैज्ञानिकहरूले पुष्टि गरिसकेका छन् ।

यसका बारेमा सबैभन्दा पहिला सन् १९२८ मा वैज्ञानिक पाल डिराकले लेखेका थिए । जसलाई त्यतिबेलाका केही पत्रिकाहरूले न्यूटनपछिका सबैभन्दा ठूला ब्रिटिश वैज्ञानिक मान्दै लेख लेखेका थिए ।

यो प्रतिपदार्थलाई वैज्ञानिकहरूले अन्तरिक्षमा जाने साधनमा इन्धनका रूपमा प्रयोग गर्न सकिने भन्दै अध्ययन गरिरहेका छन् ।

–एजेन्सीको सहयोगमा