काठमाडौं- दुर्घटनामा घाइते भएका नेपाली राष्ट्रिय क्रिकेट टिमका सदस्य ललित भण्डारीको अप्रेसन गरिने भएको छ।

आइतबार बेलुका कञ्चनपुरको झलारीमा ट्रक र मोटरसाइकल एक आपसमा ठोकिँदा घाइते भएका भण्डारीको हात र खुट्टामा चोट देखिएपछि अप्रेसन गर्ने तयारी भएको हो ।

धनगढीबाट महेन्द्रनगर जाँदै गरेको से १ ख १३२४ नंम्बरको ट्रकले भण्डारी सवार म २ प ४७०५ नम्बरको मोटरसाइकललाई ठक्कर दिँदा उनीसँगै करन ठगुन्नालाई चोट लागेको थियो।

दुर्घटनापछि गम्भीर घाइते भएका भण्डारीको शुक्लाफाटा क्लिनिकमा प्राथमिक उपचारपछि धनगढीकै निसर्ग अस्पतालमा लगिएको थियो ।

धनगढीबाट गएराति नै नेपालगञ्ज मेडिकल कलेज कोहलपुरका लागि रिफर गरिएका उनको सिटी स्क्यान रिपोर्ट सामान्य आएको आफूले जानकारी पाएको राष्ट्रिय क्रिकेट टिमका अलराउन्डर पारस खड्काले बताए।

पूर्वकप्तान खड्का र भण्डारीबीच गएराति नै फोन संवाद पनि भएको छ । `ललितसँग हिजो राति धनगढीबाट कोहलपुर आउनेक्रममा  कुरा भएको थियो । दुई हात र दाहिने खुट्टाको थाईको हड्डीमा चोट लागेको र त्यसको अप्रेसन गर्नुपर्ने एम्बुलेन्समा सँगै रहेका चिकित्सकले भन्नु भएको थियो,´ खड्काले भने।