काठमाडौं – तेक्वान्दो खेलाडी कमल श्रेष्ठले प्रथम २०२० विश्व अनलाईन पुम्से च्याम्पियनको स्वर्ण पदक जितेका छन् ।

३० वर्ष मुनिको विधामा कमलले स्वर्ण जित्दा सोहि विधामा नेपालका जितबहादुर बोटेले रजतपदक हात पारे भने कास्य पदक पनि नेपालले नै जितेको छ ।
३० वर्षमुनिको कास्य प्रेमबहादुर लिम्बूले दिलाएका हुन् ।

फ्रान्समा जारी च्याम्पियनसिपमा नेपालले एक स्वर्ण सहित २ रजत र एक कास्य जितेको हो ।

३० वर्ष मुनिकै महिलातर्फ नेपालकी पार्वती गुरुङले रजत पदक हात पारेकी हुन् । उक्त विधामा अमेरिकाकी खेलाडीले स्वर्ण पदक जित्दा बुल्गेरियन खेलाडीले कास्य पदक हात पारेकी हुन् ।

स्वर्ण विजेता कमलले ७.६७ अंकका साथ स्वर्ण पदक जितेका हुन् । जितबहादुरले ७.५४ र प्रेमले ७.५० अंक बटुलेका थिए ।

महिला ३० वर्ष मुनिको विधामा पार्वती गुरुङले ७.३ अंक बटुल्दै रजत पदक हात पारेकी हुन् ।

कोरोना भाइरसको महामारीकाबीच भएको यो प्रतियोगितामा सहभागी सबै खेलाडी १३ दक्षिण एसियाली खेलकुदमा पदक विजेता खेलाडी हुन् ।