काठमाडौं – सुदर्शन थापा निर्देशित फिल्म ‘म यस्तो गीत गाउँछु २’ को ट्रेलर रिलिज गरिएको छ । राजधानीको क्युज सिनेमा हलमा एक कार्यक्रमको आयोजना गर्दै सार्वजनिक गरिएको ट्रेलर युट्युबमार्फत समेत सार्वजनिक गरिएको छ ।

ट्रेलरप्रति दर्शकले माया दर्शाएका छन् । अपलोड गरिएको केही समयमै फिल्मको ट्रेलरमा हजारौं प्रतिक्रिया आएका छन् ।

ट्रेलरमा पल शाह र पूजा शर्मालाई केन्द्रीय भूमिकामा देखाइएको छ । फिल्ममा पल शाह एक गायकको भूमिकामा देखिएका छन् ।

लभस्टोरी फिल्म बनाउन माहिर सुदर्शन थापाले फिल्मको स्तरीयतामा मेहनत गरेको ट्रेलरमा झल्किन्छ ।

पल र पूजाका अलावा हरिहर शर्मा, राजा राजेन्द्र, गणेश गिरी, सोनिका रोकाया लगायतका कलाकारको शीर्ष भूमिका रहेको फिल्मलाई सौरभ लामाले छायांकन गरेका हुन् ।

फिल्ममा निर्देशक थापाको कथा छ भने स्किृप्ट शिवम् अधिकारी र दिनेश न्यौपानेले लेखेका हुन् ।

वनिष शाह र मिलन श्रेष्ठको सम्पादन रहेको यो फिल्ममा पूजा शर्मा र सुदर्शन थापाको लगानी रहेको छ । यो फिल्म फागुन ३० गतेदेखि प्रदर्शनमा आउँदैछ ।