काठमाडौं– सत्तारुढ नेपाल कम्युनिस्ट पार्टी (नेकपा)ले बुधबार बिहान ११ बजे बस्ने गरी स्थायी कमिटीको बैठक बोलाएको छ ।

नेकपाका स्थायी कमिटी सदस्य हरिबोल गजुरेलले बुधबार बिहान ११ बजे पार्टी मुख्यालय धुम्बाराहीमा बस्ने गरी पार्टी स्थायी कमिटीको बैठक बोलाइएको जानकारी दिए ।

‘भोलि (बुधबार) बिहान ११ बजे पार्टी मुख्यालयमा पार्टी स्थायी कमिटी बैठक बस्ने भन्ने सूचना आएको छ,’ गजुरेलले खबरहबसँगको कुराकानीमा भने ।

सरकारले केही हप्ता अगाडि २ वटा अध्यादेश ल्याएपछि पार्टीमा विवाद बढेको सन्दर्भमा नेकपाका २० जना स्थायी कमिटी सदस्यहरुले स्थायी कमिटी बैठक बोलाउन २ जना अध्यक्ष केपी शर्मा ओली र पुष्पकमल दाहाल (प्रचण्ड)लाई ज्ञापन पत्र बुझाएका थिए ।

जसअनुसार वैशाख २० गते (शनिबार) बसेको पार्टी सचिवालय बैठकले २५ गते (बिहीबार) स्थायी कमिटी बैठक बोलाउने निर्णय गरेको थियो ।

२५ गते बस्ने भनिएको स्थायी कमिटी बैठकका एजेन्डा तय गर्न भनेर अघिल्लो दिन बुधबार अपराह्न सचिवालय बैठक समेत बसेको थियो ।

तर, सचिवालय बैठकमा विवाद बड्दा प्रधानमन्त्री समेत रहेका अध्यक्ष ओली बैठकको बीचमैउठेर हिँडेपछि बैठक बिना निष्कर्ष सकिएको थियो ।

बुधबारको सचिवालय बैठकले पार्टीको स्थायी कमिटी बैठक र बैठकका कार्यसूचीका सम्बन्धमा निर्णय गर्ने जिम्मा २ अध्यक्षलाई दिएको थियो ।

सचिवालय बैठक सकिएपछि २ अध्यक्ष ओली र प्रचण्डबीच छलफल भएको थियो ।
अध्यक्षद्वयको छलफलमा नै बिहीबारदेखि शुरु हुने स्थायी कमिटी बैठक स्थगित गर्ने सहमति भएको थियो ।

नेकपा अध्यक्ष प्रचण्डले एजेन्डाको विषयमा गृहकार्य नपुगेको भन्दै बैठक स्थगित भएको जानकारी दिएका थिए ।