काठमाडौं – नायिका वर्षा शिवाकोटीले लकडाउनका बेलामा पुस्तक पढिरहेकी छिन् । उनले लामो समयदेखि पढ्न नपाएका पुस्तक यो लकडाउनका बेलामा पढेको बताउँछिन् ।

विदेशीदेखि नेपाली लेखकका पुस्तक पढेको बताउने वर्षाले हालै साहित्यकार बुद्धिसागरको उपन्यास ‘कर्णाली ब्लूज’ पढेको र उक्त पुस्तक मन परेको प्रतिक्रिया दिएकी छिन् ।

सामाजिक सञ्जाल फेसबूकमा वर्षा लेख्छिन् – जति पाना पल्टिँदै गए, त्यति लाग्यो कि पना कहिल्यै नसकिऊन् । हरेक पानाले बोलेका कथाले मनमा मीठो प्रभाव पारेका छन् ।

उनले यो उपन्यास हालै पढेर सकेको बताएकी छिन् । उनी भन्छिन्, ‘यो पुस्तकबारे अरु त के भनूँ, धेरैले त पढ्नु नै भएको होला ।’

लकडाउनका कारण वर्षा यतिबेला फुर्सदमा छिन् । उनले केही समयमअघि नारायण वाग्लेको ‘पल्पसा क्याफे’, खगेन्द्र लामिछानेको ‘फुलानी’ र मिचेल ओबामाको ‘बिकमिङ’ पढेको बताएकी थिइन् ।

वर्षाले अभिनय गरेको फिल्म ‘लक्का जवान’ गत चैत्रमा रिलिज हुने भनिएको थियो । लकडाउनका कारण अब उक्त फिल्म कहिले रिलिज हुने भन्ने टुङ्गो छैन ।