काठमाडौं – यसै वर्ष अभिनेता विराज भट्टको फिल्म ‘साङ्लो’ रिलिज भयो । यो फिल्ममार्फत विराजले निर्देशनमा पनि हात हालेका थिए । कुनै बेला एक्सन स्टारको क्रेज बनाएका विराज यो फिल्मबाट थप आशावादी थिए ।

फिल्म रिलिजपछि भने विराजले राम्रो प्रतिक्रिया पाएनन् । सिङ्गल थिएटरमा फिल्मले कमालको व्यापार गरे पनि मल्टिप्लेक्समा व्यापार गर्न सकेनन् ।

यो फिल्मबाट विराज भने निकै आशावादी थिए । उनले फिल्म उत्कृष्ट बनाएको र बलिउड तथा हलिउडले पनि आफ्नो फिल्मबाट सिक्ने भन्दै अन्तर्वार्ता दिएका थिए ।

एक खाले दर्शकलाई फिल्मले मनोरञ्जन दिलाए पनि फिल्मले ठूलो दर्शक समूहलाई छुन सकेन । अझ फिल्म मेकिङका हिसाबले त ‘साङ्लो’ बिर्सनलायक रह्यो ।

वर्षभरि नै विराज यही फिल्मका कारण चर्चामा रहे । तर, फिल्म नै राम्रो नबन्दा उनी पुनः हराए । अब त उक्त फिल्मलाई दर्शकले भुलिसकेका छन् ।

एउटा फिल्मले कलाकारलाई एक युगसम्म सम्झना दिलाउँछ । विराजको ‘साङ्लो’ भने रिलिजको एक हप्तामै चर्चाविहीन रह्यो ।

चर्चा र सम्भावनाका साथ विराज आफूले चाहेजस्तो फिल्म लिएर नेपाली दर्शकमाझ त आए । तर, यो फिल्म उनका लागि मात्र होइन, दर्शकका लागि पनि ‘हात लाग्यो शून्य’ जस्तै बनेको छ ।