अमगरढी– डडेल्धुरा सदरमुकामस्थित डडेल्धुरा अस्पतालको आइसोलेसन वार्डबाट भागेका २ जनाको कोरोना भाइरस परीक्षणको रिपोर्ट नेगेटिभ आएको छ ।

अस्पतालका निमित्त मेडिकल सुपरिटेन्डेन्ट डा जगदीशचन्द्र विष्टले काठमाडौंको राष्ट्रिय जनस्वास्थ्य प्रयोगशालामा परीक्षणको क्रममा २ जनाको रिपोर्ट नगेटिभ आएको बताए ।

ज्वरो र रुघाखोकी लक्षण देखिएपछि कोरोना भाइरस संक्रमणको आशंकामा भागेश्वर गाउँपालिका–३ नानीडाँडाकी ४० वर्षीया महिला र उनका १९ वर्षीया छोरा चैत २६ गते अस्पतालको आइसोलेसन वार्डमा भर्ना भएका थिए ।

अस्पतालले भर्ना भएकै दिन उनीहरुको थ्रोट स्वाव (नमूना) संकलन गरी परीक्षणका लागि काठमाडौं पठाएको थियो ।

उनीहरु भने परीक्षणको नतिजा नआउँदै शनिबार अपराह्न अस्पतालबाटै भागेका थिए ।