काठमाडौँ- प्रतिबन्धित नेत्रविक्रम चन्द ‘विप्लव’ नेतृत्वको नेकपाका नाममा ३ करोड रूपैयाँ चन्दा मागेको आरोपमा चार जना काठमाडौंबाट पक्राउ परेका छन् ।

महानगरीय अपराध महाशाखाको टोलीले नुवाकोट घर भएका बिन्तोष सिलवाल, रामेछाप घर भएका रामदल श्रेष्ठ (अटल), काभ्रेका तीर्थमान तामाङ र चितवनका नन्दुराज आचार्यलाई पक्राउ गरेको हो । ४२ वर्षीय आचार्य कानुन व्यवसायी हुन् ।

सो समूहले कन्सल्टेन्सी संचालकसँग धम्क्याउँदै तीन करोड चन्दा मागेको महानगरीय अपराध महाशाखाका प्रहरी बरिष्ठ उपरिक्षक (एसएसपी) दीपक थापाले बताए ।

रामेछापको सुनापती घर भएका ३१ वर्षीय रामदल श्रेष्ठ ‘अटल’ विप्लव समूह रामेछापका पूर्वजिल्ला सेक्रेटरी हुन् । अहिले आफूले सो समूह परित्याग गरेको उनले प्रहरीलाई बताएका छन् ।

कानून व्यवसायी समेत रहेका ४२ वर्षीय आचार्यले ‘हामी विप्लव समूहका हौं’ तीन करोड चन्दा नदिए ‘दुई दिनमा सिध्याइ दिन्छौँ’ भन्दै कन्सल्टेन्सी संचालकलाई धम्की दिएको प्रहरीले जनाएको छ ।

बिन्तोष सिलवाललाई नुवाकोटमा डोजर आगजनी गरेको मुद्दामा प्रहरीले यसअघि पनि पक्रेको थियो । उनीहरूलाई अदालतबाट तीन दिनको म्याद लिएर थप अनुसन्धान भइरहेको महानरीय प्रहरी परिसर काठमाडौंले जानकारी दिएको छ ।