काठमाडौं – अष्ट्रेलियामा कोरोनाबा भाइरसको संक्रमणपछि एसियालीविरुद्ध भेदभाव देखिएको चीनले आरोप लगाएको छ ।

अष्ट्रेलियाले अहिले पनि कोरोनाको महामारी प्रभावकारी रूपमा नियन्त्रण गर्न नसकिएको तथा एसियाका नागरिकमा भेदभाव हुने भएकाले तत्काल त्यहाँ अध्ययनका लागि नजान उसले आफ्ना नागरिकलाई अपिल गरेको छ ‍।

चीनको शिक्षा मन्त्रालयले कोरोनाको खतरा र देखिएको भेदभावलाई सम्भावित जोखिमको रूपमा देखाउँदै तत्कालै पढ्नको लागि नजान भनेको हो ।

अन्तर्राष्ट्रिय भ्रमण र खुला क्याम्पसहरूमा जोखिम रहेको भन्दै अब त्यहाँ पढ्न जाने वा नजानेबारे गम्भीर छलफल गर्नुपर्ने मन्त्रालयले जनाएको छ ।

अन्तर्राष्ट्रिय विद्यार्थीहरूको लागि लोकप्रिय गन्तव्य अष्ट्रेलियामा चीनको उक्त आरोपसँगै त्यहाँ चिनियाँ विद्यार्थीको संख्या घट्ने आकलन हुन थालेको छ ।

अष्ट्रेलियाले कोरोना भाइरसको उद्भवका बारेमा स्वतन्त्र अनुसन्धानको लागि आह्वान गरेदेखि चीन र अष्ट्रेलियाबीचको सम्बन्ध चिसिदै गएको बीबीसीले जनाएको छ ।